ជំនឿ ក្នុងគម្ពីរសាសនាគ្រិស្តនិងជំនឿមនុស្សចចកនៅហ្វីលីពីនខណៈពេលព្រះច័ន្ទក្រហមរះឡើងដូចឈាម
យូរៗម្ដងនៅផ្នែកខ្លះនៃពិភពលោករួមមានអាមេរិកនិងអូស្ត្រាលី មានបាតុភូតដ៏ចម្លែកមួយកើតឡើង គឺព្រះចន្ទ្រក្រហមដូចឈាម និងពណ៌ទឹកក្រូច ។ បាតុភូតដ៏កម្រនេះមានដំណើររយៈពេល៣ម៉ោងនៅម៉ោង២រំលងអធ្រាតនៅពេលដែលព្រះចន្ទ្រចាប់ផ្តើមធ្វើចលនាចូលទៅជ្រកក្រោមស្រមោលផែនដី ។ មួយម៉ោងក្រោយមកព្រះចន្ទ្រអាចមើលឃើញពេញរូបរាង ហើយបានប្រែពណ៌ទៅជាទឹកក្រូចក្រហម និងពណ៌ត្នោត ។ បាតុភូតព្រះចន្ទ្រក្រហមនេះអាចមើលឃើញច្បាស់នៅប្រទេសអូស្ត្រាលី នូវែលហ្សេឡង់និងបណ្តាប្រទេសនៅទ្វីបអាមេរិក ដែលវាបង្ហាញខ្លួនទើបកាលពីឆ្នាំមុននេះឯង ។
បើយោងតាមព្រះគម្ពីរសាសនាគ្រីស្តបានចែងថា ព្រះអាទិត្យបានប្រែជាងងឹត ហើយព្រះចន្ទ្រប្រែជាពណ៌ឈាម១ថ្ងៃមុនពេលព្រះជាម្ចាស់ចុះមកឋានកណ្តាល ។ ទេពធិតា៤អង្គឈរទប់ផែនដីមិនឱ្យវិល មុនពេលដែលទេពធិតា១អង្គទៀតចុះពីឋានព្រះអាទិត្យដោយមានកាន់ត្រាព្រះជាម្ចាស់ ប្រាប់ទៅទេពធិតាទាំង៤អង្គដែលប្រុងប្រើអំណាចដើម្បីបំផ្លាញ ហើយប្រសិនចង់បំផ្លាញលុះត្រាណាបោះត្រាលើថ្ងាសកូនចៅព្រះអស់សិន ។
គេនៅចាំបានថា កាលពីប៉ុន្មានឆ្នាំមុននៅស្រុកខ្មែរដូចជានៅទូទាំងពិភពលោកនាំគ្នាល្បីថា ពិភពផែនដីនឹងងងឹតដូចយប់នៅពេលថ្ងៃ ។ ប៉ុន្តែកាលនោះគេពុំទាន់បានឃើញផែនដីងងឹតដូចយប់ទេ គ្រាន់តែមេឃស្រទុំអត់ពន្លឺរាងងងឹតស្លប់ៗបន្តិចប៉ុណ្ណោះ ។ តែប៉ុន្មានថ្ងៃមុននេះ គឺនៅថ្ងៃទី១៦ ខែមេសា គឺមានព្រះចន្ទ្រមានពណ៌ក្រហមពិតមែន ។ តើរឿងនេះដូចជាទំនាយព្រះគម្ពីរគ្រឹស្គបានទស្សន៍ទាយមែនឬ ? ប៉ុន្តែបើតាមជំនឿនៅក្នុងប្រទេសហ្វីលីពីនគឺគេបានថតខ្សែភាពយន្តមួយតាមរឿងរបស់ប្រទេសនេះដោយបញ្ជាក់ថា មនុស្សនៅប្រទេសនេះមួយចំនួនបានក្លាយទៅជាសត្វចចកតែក៏បានក្លាយជាមនុស្សវិញដែរ ។
ប៉ុន្តែប្រសិនបើគេពុំអាចរកវិធីដោះស្រាយឱ្យមនុស្សចចកក្លាយជាមនុស្សបានចុះព្រះចន្ទ្រក្រហមកើតឡើងទេនោះមនុស្សចចកទាំងអស់គ្មានថ្ងៃវិលមកមនុស្សវិញបានជារៀងរហូតហើយ ។ ដោយឡែកទាក់ទងជំនឿព្រះចន្ទ្រក្រហមនៅស្រុកខ្មែរវិញគេពុំសូវឮសូរនិយាយទេ គឺគេច្រើនលើកអំពីបាតុភូតសូរ្យគ្រាស ចន្ទ្រគ្រាស (រាហ៊ូចាប់ចន្ទ្រ)ធ្វើឱ្យអ្នកស្រុកសម្បូរសប្បាយ ឬកើតកល់យុគតាមទម្លាប់ដែលគេជឿ ៕
ប្រភពពី : សុផាន់ម៉ៃ
website: khmerapsara.news
ប្រភពពី : សុផាន់ម៉ៃ
website: khmerapsara.news
Comments
Post a Comment